خان سوار خر وابی گرن سیاسیه...

خان سوار خر وابی،
گِرِن سیاسیَه

غضنفر پدر وابی،
گِرِن سیاسیَه

مَن کتابی ، گِلَنبر،
نُه بار بچّه زاییی

نُه تا همه پسر وابی
گِرِن سیاسیَه

خوبَل شهر بَی یَک،
دل و کنجه ایخرن

تا شِم ایما جگر وابی،
گِرِن سیاسیَه


خواسُم اَوو بخرُم،
پام ره پس دیوار

لیوانمون دمر وابی،
گِرِن سیاسیَه

طرف هَی مَه و قمر ایکِه،
گِرِن بی خیالش

تا مَه ایما قمر وابی،
گِرِن سیاسیَه


دانش آموزی وه کرمون،
وه بخت بد هنر خوند

اوسو که باهنر وابی،
گِرِن سیاسیَه

یه تِیَه ی عمه چپ بی،
گفتند اجتماعیه

باوا کر وابی،
گِرِن سیاسیَه



گامون زایی،
گفتِن یو عجیبه

گاو کریم بقر وابی،
گِرِن سیاسیَه


گِرن اعتراضَل،
کار برنج هندیه

یمن پر اَ شکر وابی،
گِرِن سیاسیَه

یه روکنار دریا،
یه موج گپویی اومه

تُمبون شیخ تر وابی،
گِرِن سیاسیَه



مِن فوتبال یه رو،
دروازه بون زمین خَه

دردش که بیشتر وابی،

گِرِن سیاسیَه


عطّار یه نسخه ای نوشت،
گفتند شبهه ناکه

خیّام کوزه گر وابی،
گِرِن سیاسیَه

شاعر وه فکر افتا،
که عاشقی چی خوبیه

آماده ی سفر وابی،
گِرِن سیاسیَه